1989年遇到我的小學老師，她是一位基督徒。當時的我，因為父母在我5歲時離異，媽媽要去菲律賓工作，所以好唔開心。而當時離婚並不普遍，我會問點解要發生喺我身上。老師陪我傾計，開解我，同我祈禱，讓我感受到從神而來嘅愛。有一日她帶我去佈道會，我就在那天決志信主。

到我中學的時候，就讀基督教學校，中四 (1996年) 那年，我跟同學一齊返教會(五旬節聖潔會永光堂) 參與團契、崇拜。大約返咗兩年，因我嫲嫲患了cancer， 才發現自己放太多時間在教會內，完全冇時間陪家人，所以就停了沒有再返教會，將時間全放在陪伴嫲嫲上，但仍然有每天祈禱。到我嫲嫲2003年離世，我已經出來工作，當時嘅我性格暴躁，驕傲自大，每日都粗口橫飛，按自己心意做事， 不知不覺，慢慢遠離神 。

直至2017年，我生完大仔8個月，發現自己有cancer，内心好亂，好徬徨，好擔心，唔敢同太多人講，驚佢哋擔心我。感謝神嘅帶領，叫我去搵兩個基督徒中學同學，同佢地講我有病，佢哋二話不說就即刻約我出來傾談，並且同我約定每晚10點打電話一齊祈禱，將我再帶返去神裡面，讓我感到平安。當時自己只有一個祈求，就係希望冇擴散。當時同神承諾，如果冇擴散，我願意重新去認識袮。

2020年，感謝神帶領我大仔入讀荃灣浸信會幼稚園，參加學校嘅彩虹時刻，認識了雷姑娘和3位媽媽。大家一齊喺2024年參加了雷姑娘的信仰探索班，讓我知道神的偉大並承認自己嘅渺小。感謝主喺我信仰路上叫我遇到嗰3位媽媽，大家一起同行，互相扶持，叫我們更深入地理解神的愛和恩典。我們一齊返團契，一齊上堂，增強我們的靈性，幫助我們在集體敬拜中感受到神的臨在。讓我對神充滿敬畏和感恩，激勵我在信仰中不斷成長。

喺上堂和返團契當中，上帝一路改變我，叫我變得平和、虛心、平安，並學習按神嘅心意行事。有一晚，突然心有感動，叫我一定要參加生命成長課，並要喺我移民之前，先喺荃浸受浸。

感謝主，一次又一次將我拉返去佢身邊，改變我，讓我有勇氣去受浸，公開承認自己係基督徒。我體會到神是一位充滿愛與恩典的神，神對我的愛是無條件的，無論我的過去如何，祂始終接納我。神擁有無窮的智慧，祂為我的計劃和安排一定係最好的！神在我的生活中時刻陪伴，無論是喜樂或困難的時刻，祂都不會離開我。